ސަރުކާރުގެ އިދާރާތާކާއި ކުންފުނިތަކުގެ މުވައްޒަފުންނަށް ޚާއްސަކޮށްގެން ހިންގި ދިވެހިބަހާއި ތާރީޚުގެ ކުރު މުއްދަތުގެ ކޯސް ނިމިއްޖެއެވެ. 2024 ނޮވެންބަރު 17 ވީ އާދިއްތަ ދުވަހުން ފެށިގެން ނޮވެންބަރު 21 ބުރާސްފަތި ދުވަހުގެ (މިއަދުގެ) ނިޔަލަށް ކުރިއަށް ގެންދެވުނު މި ކޯހަކީ 10ގަޑިއިރުގެ ކޯހެކެވެ.
ކޯހަށް އިޢުލާނުކުރީ ކޮންމެ އިދާރާއަކުން 3 ބައިވެރިންނަށް ބައިވެރިވެވޭ ގޮތަށް، ޖުމްލަ 100 ފަރާތަކަށް ފުރުސަތު ދޭ ގޮތަށެވެ. ނަމަވެސް ސަރުކާރުގެ އިދާރާތަކާއި ކުންފުނިތަކުން މި ކޯހަށް ޝައުގުވެރިކަން ފާޅުކޮށް ބޮޑު ތަރުހީބެއް ލިބިފައިވާތީ ކޯހުގައި ބައިވެރިވާން އެދުނު ހުރިހައި ފަރާތްތަކަށް ފުރުސަތު ދެވިފައި ވެއެވެ.
މި ކޯހުގެ މަގުސަދަކީ ދިވެހިބަހުގެ ހަމަތަކާއި ގަވާއިދުތަކާއި އުސޫލުތަކާ އެއްގޮތަށް ލިޔެކިޔުންތައް ބެހެއްޓުމާއި އަދަބު އިހުތިރާމާ އެކު މުއާމަލާތުކުރާނެ ގޮތްތައް މުވައްޒަފުންނަށް އޮޅުންފިލުވައިދިނުމާއި ދިވެހިރާއްޖޭގެ ތާރީޚުގެ މުހިންމު ކަންކަމުގެ މައުލޫމާތު ދިނުމެވެ.
އާންމުކޮށް އިޢްލާންކޮށްގެން، މުޅި ރާއްޖެއަށް ހުޅުވައިލައިގެން، ދައުލަތުގެ އިދާރާތަކާއި ކުންފުނިތަކުގެ މުވައްޒަފުންނަށް ޚާއްސަކޮށްގެން ދިވެހިބަހުގެ އެކެޑަމީން ދާދިވަރުކޮށާއި (އޮންލައިންކޮށާއި) ކިލާހަށް ހާޒިރުވެ، ކިޔަވާ އުސޫލުން ހިންގި މި ކޯހުގައި ކިލާހަށް ހާޒިރުވެގެން 20 ބައިވެރިޔަކު، އަދި ދާދިވަރުކޮށް 322 ބައިވެރިން ބައިވެރިވެ ސެޓިފިކެޓް ހާސިލްކޮށްފައިވެއެވެ.
މި ކޯހުގެ ކިލާސްތައް ކުރިއަށް ގެންދެވުނީ 5 ދަންފަޅިއަށް ބަހައިލައިގެންނެވެ. ކިޔަވައިދެވުނު ބައިތަކުގެ ތެރޭގައި ދިވެހިރާއްޖޭގެ ތާރީޚުގެ މުހިންމު ކަންކަމުގެ މައުލޫމާތާއި، ލަފުޒު ވަކިކޮށް ލިޔުމުގެ ގަވާއިދު އޮޅުންފިލުވައިދިނުމާއި ސުކުނާއި ފިލިތައް އޮޅުންފިލުވައިދިނުމާއި ދިވެހިބަހުގެ ދަރަޖަތައް ބޭނުންކުރާ ގޮތް އޮޅުންފިލުވައިދިނުމާއި ސާފު ރީތި ބަހުން އިބާރާތްކުރާނެ ގޮތް ކިޔައިދީ، މި ބައިތަކަށް ކޯހުގެ ބައިވެރިން އަހުލުވެރިކުރުވައިފައިވެއެވެ.
މި ކޯހުގައި ކިޔަވައިދެއްވީ ދިވެހިރާއްޖޭގެ ޤައުމީ ޔުނިވަރސިޓީގެ ދާރިސް އަލްފާޟިލް މުޙައްމަދު ދީދީއާއި ދިވެހިރާއްޖޭގެ ޤައުމީ އަރުޝީފުގެ ޑިރެކްޓަރ ޖެނެރަލް އަލްފާޟިލް މުޙައްމަދު އާމިރު (ފަރެސް އާމިރު) އާއި ދިވެހިރާއްޖޭގެ ޤައުމީ ޔުނިވަރސިޓީގެ ދާރިސް އަލްފާޟިލް އަބްދުއްﷲ ޖަމީލާއި ދިވެހި ބަހާއި ސަގާފަތާއި ތަރިކައާ ބެހޭ ވުޒާރާގެ މުޝީރު އަލްފާޟިލް މުޙައްމަދު ޝާހިދު ހަލީމާއި ދިވެހިބަހުގެ އެކެޑަމީގެ ރައީސް ޑރ. އަޝްރަފް ޢަބްދުއްރަހީމެވެ.
