ސަރުކާރުގެ އިދާރާތާކާއި ކުންފުނިތަކުގެ މުވައްޒަފުންނަށް ޚާއްސަކޮށްގެން ދިވެހިބަހާއި ތާރީޚުގެ ކުރު މުއްދަތުގެ ކޯހެއް ފަށައިފިއެވެ. މި ކޯހަކީ އާންމުކޮށް އިޢްލާންކޮށްގެން، މުޅި ރާއްޖެއަށް ހުޅުވައިލައިގެން، ދައުލަތުގެ އިދާރާތަކާއި ކުންފުނިތަކުގެ މުވައްޒަފުންނަށް ޚާއްސަކޮށްގެން ދިވެހިބަހުގެ އެކެޑަމީން ދާދިވަރުކޮށާއި (އޮންލައިންކޮށާއި) ކިލާހަށް ހާޒިރުވެ، ކިޔަވާ އުސޫލުން ހިންގާ ކޯހެކެވެ. މިއަދު ފެށި މި ކޯހުގައި ކިލާހަށް ހާޒިރުވެގެން 20 ބައިވެރިޔަކު، އަދި ދާދިވަރުކޮށް 322 ބައިވެރިން ބައިވެރިވެފައި ވެއެވެ.
މި ކޯހުގެ ކިލާސްތައް ކުރިއަށް ގެންދާނީ 5 ދަންފަޅިއަށް ބަހައިލައިގެންނެވެ. ކިޔަވައިދޭ ބައިތަކުގެ ތެރޭގައި ދިވެހިރާއްޖޭގެ ތާރީޚުގެ މުހިންމު ކަންކަމުގެ މައުލޫމާތާއި، ލަފުޒު ވަކިކޮށް ލިޔުމުގެ ގަވާއިދު އޮޅުންފިލުވައިދިނުމާއި ސުކުނާއި ފިލިތައް އޮޅުންފިލުވައިދިނުމާއި ދިވެހިބަހުގެ ދަރަޖަތައް ބޭނުންކުރާ ގޮތް އޮޅުންފިލުވައިދިނުމާއި ސާފު ރީތި ބަހުން އިބާރާތްކުރާނެ ގޮތް ކިޔައިދީ، މި ބައިތަކަށް ކޯހުގެ ބައިވެރިން އަހުލުވެރިކުރުމެވެ. މި ކޯހުގައި ކިޔައިވައިދެއްވާނީ މި ދާއިރާތަކުގެ ތަޢުލީމާއި ތަޖުރިބާ ލިބިވަޑައިގެން ތިއްބެވި ދާރިސުންނެވެ.
ކޯހަށް އިޢުލާނުކުރީ ކޮންމެ އިދާރާއަކުން 3 ބައިވެރިންނަށް ބައިވެރިވެވޭ ގޮތަށް، ޖުމްލަ 100 ފަރާތަކަށް ފުރުސަތު ދޭ ގޮތަށެވެ. ނަމަވެސް ސަރުކާރުގެ އިދާރާތަކާއި ކުންފުނިތަކުން މި ކޯހަށް ޝައުގުވެރިކަން ފާޅުކޮށް ބޮޑު ތަރުހީބެއް ލިބިފައިވާތީ ކޯހުގައި ބައިވެރިވާން އެދުނު ހުރިހައި ފަރާތްތަކަށް ފުރުސަތު ދެވިފައި ވެއެވެ.
މި ކޯހުގެ މަގުސަދަކީ ދިވެހިބަހުގެ ހަމަތަކާއި ގަވާއިދުތަކާއި އުސޫލުތަކާ އެއްގޮތަށް ލިޔެކިޔުންތައް ބެހެއްޓުމާއި އަދަބު އިހުތިރާމާ އެކު މުއާމަލާތުކުރާނެ ގޮތްތައް މުވައްޒަފުންނަށް އޮޅުންފިލުވައިދިނުމާއި ދިވެހިރާއްޖޭގެ ތާރީޚުގެ މުހިންމު ކަންކަމުގެ މައުލޫމާތު ދިނުމެވެ.
10 ގަޑިއިރަށް ކުރިއަށް ގެންދާ މި ކޯސް އޮންނާނީ 2024 ނޮވެންބަރު 17 ވާ އާދިއްތަ ދުވަހުން ފެށިގެން ނޮވެންބަރު 21 ވާ ބުރާސްފަތި ދުވަހުގެ ނިޔަލަށެވެ.
